Psalms 119

1Babusisiwe labo abandlela zabo zingelansolo, abahamba ngomthetho kaJehova.

2Babusisiwe labo abagcina imilayo yakhe, abayidinga ngenhliziyo yabo yonke.

3Kaboni lutho; bahamba ezindleleni zakhe.

4Wena ubekile iziyalezelo ukuthi zilandelwe ngokupheleleyo.

5He, aluba izindlela zami zithembekile ekulaleleni izimemezelo zakho!

6Lapho-ke ngeke ngibe lenhloni nxa ngikhumbula yonke imilayo yakho.

7Ngizakudumisa ngenhliziyo eqotho ngilokhu ngiyifunda imithetho yakho elungileyo.

8Ngizazilalela izimemezelo zakho; ungangikhalali ngempela.

9Ijaha lingaphila njani impilo ehlambulukileyo? Ngokuphila ngendlela yelizwi lakho.

10Ngikudinga ngenhliziyo yami yonke; ungangiyekeli ngiphambuke emilayweni yakho.

11Ilizwi lakho ngilifihlile enhliziyweni yami ukuze ngingenzi isono kuwe.

12Udumo kalube kuwe, O Jehova; ngifundisa izimemezelo zakho.

13Ngezindebe zami ngiyayibala yonke imithetho ephuma emlonyeni wakho.

14Kuyangithokozisa ukulandela izimiso zakho njengomuntu ethabela inotho enkulu.

15Ngiyanakana ngezimiso zakho ngikhumbule ngezindlela zakho.

16Ngiyathokoza ngezimemezelo zakho; angiyikulidela ilizwi lakho.

17Yenzele okuhle inceku yakho ukuba ngiphile; ngizalilalela ilizwi lakho.

18Vula amehlo ami ukuze ngibone izinto ezimangalisayo emthethweni wakho.

19Ngiyisihambi emhlabeni; ungangifihleli imilayo yakho.

20Umphefumulo wami uhugekile ngokulangazelela imithetho yakho ngezikhathi zonke.

21Uyabakhuza abaklolodayo, abathukiweyo abaphambukayo emithethweni yakho.

22Susa kimi ihlazo lokweyisa, ngokuba ngiyazigcina izimiso zakho.

23Loba ababusi behlangana ngami bengigcona, inceku yakho izanakana ngezimemezelo zakho;

24Izimiso zakho ziyinjabulo yami; zingabacebisi bami.

25Ngehliselwe phansi othulini; londoloza impilo yami njengokwelizwi lakho.

26Ngabalisa izindlela zami wangiphendula; ngifundisa izimiso zakho.

27Ngenza ngizwisise imfundiso yezimiso zakho; lapho-ke ngizanakana ngezimanga zakho.

28Umphefumulo wami ukhathele ngosizi; ngiqinisa njengokwelizwi lakho.

29Ngivikela ezindleleni zenkohliso; woba lobubele kimi ngokomthetho wakho.

30Ngikhethile indlela yeqiniso; sengibeke inhliziyo yami emithethweni yakho.

31Ngibambelele ezimisweni zakho, O Jehova; ungangiyekeli ngiyangeka.

32Ngigijima ngendlela yemithetho yakho, ngokuba uyikhulule inhliziyo yami.

33Ngifundisa, O Jehova, ukulandela izimemezelo zakho; ukuthi ngizigcine kuze kufike ekucineni.

34Ngipha ukuzwisisa ukuze ngigcine umthetho wakho ngiwulalele ngayo yonke inhliziyo yami.

35Ngiqondisa endleleni yemilayo yakho, ngokuba khonapho ngifumana ukuthokoza.

36Phendulela inhliziyo yami eziyalezweni zakho kungabi ngokokuzizuzela okungokwami.

37Phendula amehlo ami asuke ezintweni ezingesulutho; londoloza impilo yami njengokwelizwi lakho.

38Gcwalisa isithembiso sakho encekwini yakho, ukuze wesatshwe.

39Susa ihlazo engilesabayo, ngoba imithetho yakho ilungile.

40Ngizilangazelela kanjani izimiso zakho! Londoloza impilo yami ekulungeni kwakho.

41Sengathi uthando lwakho olungaphuthiyo lungeza kimi, O Jehova, insindiso yakho ize njengokuthembisa kwakho;

42Lapho-ke ngizamphendula lowo ongithukayo, ngoba ngithembe ilizwi lakho.

43Ungangemuki emlonyeni ilizwi leqiniso, ngoba ithemba lami ngilibeke emithethweni yakho.

44Ngizahlala ngiwulalela umthetho wakho, okwanini lanini.

45Ngizazihambela ngikhululekile, ngokuba ngiyidingisisile imithetho yakho.

46Ngizakhuluma ngezimiso zakho phambi kwamakhosi ngingabi lamahloni,

47ngoba ngithokoza ngisemilayweni yakho ngokuba ngiyayithanda.

48Ngiphakamisela imilayo yakho izandla zami ngoba ngiyayithanda, nginakana ngezimemezelo zakho.

49Khumbula ilizwi lakho encekwini yakho, ngoba usungiphe ithemba.

50Induduzo yami phakathi kokuhlupheka kwami yile: Isithembiso sakho sigcina impilo yami.

51Abaklolodayo bangihleka baze bakholise, kodwa kangiphambuki emthethweni wakho.

52Ngiyayikhumbula imithetho yakho yekadeni, O Jehova, ngifumana ukududuzeka kuyo.

53Ngithukuthela ngife ngenxa yababi, asebedele umthetho wakho.

54Izimemezelo zakho ziyiyo injongo yengoma yami loba ngingabe ngihlala ngaphi.

55Ebusuku ngiyalikhumbula ibizo lakho, O Jehova, njalo ngizawugcina umthetho wakho.

56Le yiyo injayelo yokwenza kwami: Ngiyayilalela imithetho yakho.

57Uyingxenye yami, O Jehova; ngithembisile ukulalela amazwi akho.

58Ngiyabudinga ubuso bakho ngenhliziyo yami yonke; woba lobubele kimi njengesithembiso sakho.

59Sengizihlolile izindlela zami ngaphendula izinyathelo zami zaya ezimisweni zakho.

60Ngizaphangisa ngingaphuzi ukulalela imilayo yakho.

61Loba ababi bengangibopha ngezintambo, angiyikuwukhohlwa umthetho wakho.

62Phakathi kobusuku ngangivuke ukukubonga ngemithetho yakho emihle.

63Ngingumngane kubo bonke abakwesabayo, kubo bonke abalandela imithetho yakho.

64Umhlaba ugcwele uthando lwakho, O Jehova; ngifundisa izimiso zakho.

65Senzele okuhle isisebenzi sakho njengelizwi lakho, O Jehova.

66Ngifundisa ulwazi lokwahlulela okufaneleyo, ngokuba ngiyayikholwa imilayo yakho.

67Ngingakabi sekuhluphekeni ngalahleka, kodwa manje sengilalela ilizwi lakho.

68Ulungile njalo okwenzayo kulungile; ngifundisa izimiso zakho.

69Lokuba abaklolodayo bengibhaceke ngamanga, ngiyazigcina iziyalezelo zakho ngenhliziyo yami yonke.

70Izinhliziyo zabo zilolunya kazilazwelo, kodwa mina ngijabula ngomthetho wakho.

71Kwakukuhle kimi ukuthi ngihlutshwe ukuze ngifunde izimiso zakho.

72Umthetho ophuma emlonyeni wakho uligugu kimi okudlula izinhlamvu zesiliva legolide eziyizinkulungwane.

73Izandla zakho zangenza zangibumba; ngipha ukuzwisisa ukuze ngifunde imilayo yakho.

74Sengathi labo abakwesabayo bangathokoza nxa bengibona, ngoba sengibeke ithemba lami elizwini lakho.

75Ngiyazi, Jehova, ukuthi imithetho yakho ilungile, lokuthi ungihlukuluzile ngenxa yokuthembeka kwakho.

76Sengathi uthando lwakho olungaphuthiyo lungaba yinduduzo kimi, njengesithembiso sakho encekwini yakho.

77Isihawu sakho kasize kimi ukuze ngiphile, umthetho wakho uyikuthokoza kwami.

78Sengathi abaklolodayo bangayangiswa ngokungigcona ngingonanga lutho; kodwa mina ngizanakana ngemithetho yakho.

79Sengathi labo abakwesabayo bangaphendukela kimi, bona abezwisisa izimiso zakho.

80Sengathi inhliziyo yami ingaba msulwa ngezimiso zakho, ukuze ngingayangiswa.

81Umphefumulo wami uyayatha ngokulangazelela insindiso yakho, kodwa ngibekile ithemba lami elizwini lakho.

82Amehlo ami aseze efiphala ngokulinda isithembiso sakho; ngithi, “Uzaze ungiduduze nini na?”

83Lanxa nginjengesixaxa sewayini esesikhumba sifuswe entuthwini, kangizilibali izimiso zakho.

84Inceku yakho izalinda kuze kube nini na? Uzabajezisa nini abangihluphayo na?

85Abaklolodayo bangigebhela amagodi, bephikisa umthetho wakho.

86Yonke imilayo yakho ithembekile, ngisiza, ngoba abantu bayangichukuluza kungelasizatho.

87Baphose bangesula emhlabeni, kodwa kangiyilahlanga imithetho yakho.

88Ngivuselela ngomusa wakho olothando, ukuze ngigcine izimiso zomlomo wakho.

89Ilizwi lakho, O Jehova, kalipheli lanini; limi liqinile emazulwini.

90Ukuthembeka kwakho kukhona kuzo zonke izizukulwane; wawumisa umhlaba, uzakuma kokuphela.

91Imithetho yakho imi lalamhla lokhu, ngoba zonke izinto zikhonza wena.

92Aluba umthetho wakho ubungesiyo injabulo yami ngabe ngabhubha ngiphakathi kokuhlupheka kwami.

93Kangisoze ngafa ngayilibala imithetho yakho, ngoba ngayo uyilondolozile impilo yami.

94Ngisindisa ngokuba ngingowakho; ngiyidingisisile imithetho yakho.

95Ababi balindele ukungichitha, kodwa ngizanakana ngezimiso zakho.

96Kukho konke ukuphelela ngibona kulomkhawulo; kodwa imilayo yakho ayilamingcele.

97O he, ngiwuthanda kangakanani umthetho wakho! Ngikhumbula ngawo ilanga lonke.

98Imilayo yakho iyangihlakaniphisa kulezitha zami, ngokuba ngihlezi ngilayo.

99Ngicacile ukuqedisisa kwami kulabafundisi bami, ngoba ngiyanakana ngezimiso zakho.

100Ngiyezwisisa okudlula abadala, ngoba ngiyayilalela imithetho yakho.

101Izinyawo zami kaziyinyathelanga layiphi indlela embi ukuze ngilalele ilizwi lakho.

102Kangiphambukanga emithethweni yakho, ngokuba wena ngokwakho ungifundisile.

103Amazwi akho anambitheka kamnandi kimi, amnandi kulezinyosi emlonyeni wami!

104Ngiyazuza ukuqedisisa emithethweni yakho; ngakho ngiyayizonda loba layiphi indlela engalunganga.

105Ilizwi lakho liyisibane ezinyaweni zami liyikukhanya kwendlela yami.

106Sengenzile isifungo ngasiqinisa, ukuthi ngizalandela imithetho yakho elungileyo.

107Sengihlupheke kakhulu; londoloza impilo yami, O Jehova, njengokutshiwo yilizwi lakho.

108Yamukela, O Jehova, indumiso epheleleyo ngomlomo wami, ungifundise imithetho yakho.

109Loba ngihlezi ngizibona sengingene engozini, kangiyi kuwulibala umthetho wakho.

110Ababi sebengithiye ngomjibila kodwa kangiphambukanga emithethweni yakho.

111Izimiso zakho ziyilifa lami laphakade; ziyintokozo yenhliziyo yami.

112Inhliziyo yami izimisele ukugcina imilayo yakho kuze kube sekupheleni.

113Ngiyabazonda abantu abangongqondombili, kodwa ngiyawuthanda umthetho wakho.

114Uyisiphephelo sami lesihlangu sami; sengibeke ithemba lami elizwini lakho.

115Sukani kimi lina benzi bobubi, ukuze ngikwazi ukugcina imilayo kaNkulunkulu wami!

116Ngisekela njengesithembiso sakho ukuze ngiphile; ithemba lami lingaze labhidlika.

117Ngiqinisa ukuze ngikhululwe; ngizahlala ngizinanza izimiso zakho.

118Uyabalahla bonke labo abaphambuka ezimisweni zakho, ngoba ukukhohlisa kwabo kuyize.

119Bonke ababi bomhlaba uyabalahlela kude njengezibi; ngakho ngiyazithanda izimiso zakho.

120Inyama yami iyathuthumela ngokukwesaba; ngizwa ngiyesaba imithetho yakho.

121Ngenzile okulungileyo lokufaneleyo; ungangiyekeleli abacindezeli bami.

122Qinisa impilakahle yenceku yakho; ungayekeli abaklolodayo bangicindezele.

123Amehlo ami asefiphala elokhu ekhangele insindiso yakho, ekhangele isithembiso sakho esilungileyo.

124Yenza encekwini yakho ngokothando lwakho, ungifundise izimiso zakho.

125Ngiyinceku yakho; ngipha ukuqedisisa ukuthi ngizwisise izimiso zakho.

126Sekuyisikhathi sakho sokuthi wenze okwakho, O Jehova; umthetho wakho uyephulwa nje.

127Ngokuba ngiyayithanda imilayo yakho kulegolide, kulegolide elicengekileyo,

128njalo njengoba ngisithi imithetho yakho ilungile, ngiyayizonda yonke indlela engaqondanga.

129Izimiso zakho ziyamangalisa; ngakho ngiyazilalela.

130Ukwambulwa kwamazwi akho kuletha ukukhanya; kunika ukuzwisisa kwabayizithutha.

131Ngivula umlomo wami ngikhefuzele, ngilangazelela imilayo yakho.

132Phendukela kimi ube lomusa kimi, njengoba uhlezi ukwenza kwabathanda ibizo lakho.

133Qondisa izinyathelo zami ngokwelizwi lakho; kakungabi lesono esingibusayo.

134Ngihlenga ekucindezelweni ngabantu, ukuze ngilalele imithetho yakho.

135Yenza ubuso bakho bukhanye encekwini yakho, ungifundise izimiso zakho.

136Imifula yezinyembezi iyajuluka emehlweni ami, ngokuba umthetho wakho kawulalelwa.

137Ulungile wena Jehova, lemithetho yakho ilungile.

138Izimiso ozibekileyo zilungile; zithembekile ngokupheleleyo.

139Ukutshiseka kwami kuyangicoba, ngoba izitha zami kaziwananzi amazwi akho.

140Izithembiso zakho zihlolisisiwe kakhulu, inceku yakho iyazithanda.

141Loba ngingumuntukazana ngiseyiswa, angiyikhohlwa imithetho yakho.

142Ukulunga kwakho kumi laphakade njalo umthetho wakho uliqiniso.

143Uhlupho losizi kuyakungehlele, kodwa imilayo yakho iyikuthokoza kwami.

144Izimiso zakho zihlezi zilungile; ngipha ukuzwisisa ukuze ngiphile.

145Ngiyabiza ngayo yonke inhliziyo yami; ngiphendula, mina ngizalalela imithetho yakho.

146Ngiyakubiza, ngisindisa mina ngizagcina izimiso zakho.

147Ngivuka emathathakusa ngikhale kuwe ngicela usizo; sengibeke ithemba lami elizwini lakho.

148Amehlo ami alala ekhangele ngemilindo yonke yobusuku, ukuze ngicabange ngezithembiso zakho.

149Zwana ilizwi lami ngokuya kothando lwakho; londoloza impilo yami, O Jehova, ngokuya kwemithetho yakho.

150Labo abakha amasu amabi baseduze, kodwa bakhatshana lomthetho wakho.

151Ikanti useduze, wena Jehova, lemilayo yakho yonke iqinisile.

152Sekukade ngafunda ezimisweni zakho ukuthi wazenzela ukuthi zime lanininini.

153Khangela ukuhawula kwami ungikhulule, ngokuba kangiwukhohlwanga umthetho wakho.

154Ake ungimele ukuze ungihlenge; londoloza impilo yami njengesithembiso sakho.

155Insindiso ikhatshana kwababi, ngokuba kabazidingi izimiso zakho.

156Isihawu sakho sikhulu, O Jehova; londoloza impilo yami mayelana lemithetho yakho.

157Zinengi izitha ezingihluphayo, kodwa kangiphambukanga ezimisweni zakho.

158Ngikhangela abangakholwayo ngibenyanye, ngokuba kabalilaleli ilizwi lakho.

159Ake ubone ukuthi ngiyithanda kanganani imithetho yakho; londoloza impilo yami, O Jehova, ngokothando lwakho.

160Wonke amazwi akho aqinisile; yonke imithetho yakho elungileyo ngeyaphakade.

161Ababusi bayangihlupha kungelasizatho, kodwa inhliziyo yami iyaliqhuqhela ilizwi lakho.

162Isithembiso sakho siyangithokozisa ingathi ngumuntu othole impango enkulu.

163Amanga ngiyawazonda njalo ngiyawenyanya kodwa umthetho wakho ngiyawuthanda.

164Ngikudumisa kakhombisa ngelanga ngenxa yemithetho yakho elungileyo.

165Kukhulu ukuthula abalakho labo abathanda umthetho wakho, kakulalutho olungabakhubekisa.

166Ngiyilindele insindiso yakho, O Jehova njalo ngiyayilandela imilayo yakho.

167Ngiyazilalela izimiso zakho, ngokuba ngiyazithanda kakhulu.

168Ngiyayilalela imithetho yakho lezimiso zakho, ngokuba uyazazi zonke izindlela zami.

169Sengathi ukukhala kwami kungafika kuwe, O Jehova; ngipha ukuzwisisa njengelizwi lakho.

170Sengathi ukuncenga kwami kungafika kuwe; ngikhulula njengesithembiso sakho.

171Sengathi izindlebe zami zingageleza indumiso yakho, ngokuba uyangifundisa imithetho yakho.

172Sengathi ulimi lwami lungalihlabela ilizwi lakho, ngokuba yonke imilayo yakho ilungile.

173Sengathi isandla sakho singalungela ukungisiza, ngoba sengikhethe imithetho yakho.

174Ngilangazelela insindiso yakho, O Jehova, ngoba umthetho wakho uyinjabulo yami.

175Kangiphile ukuze ngikudumise, sengathi njalo lemithetho yakho ingangisekela.

176Ngiphambukile njengemvu elahlekileyo. Yidinge inceku yakho, ngokuba kangikayikhohlwa imilayo yakho.